Dictes-moy où, n'en quel pays,
Est Flora la belle Rommaine,
Archipiades, ni Thaïs,
Qui fut sa cousine germaine,
Echo parlant quand bruyt on maine
Dessus riviere ou sus estang,
Qui beaulté ot trop plus qu'humaine.
Mais ou sont les neiges d'antan ?
Ou est la tres sage Helloïs,
Pour qui chastré fut et puis moyne
Pierre Esbaillart a Saint Denis ?
Pour son amour ot ceste essoyne.
Semblablement ou est la royne
Qui commanda que Buridan
Fust geté en ung sac en Saine ?
Mais ou sont les neiges d'antan?
La royne Blanche comme lys
Qui chantoit a voix de seraine,
Berte au grand pié, Bietris, Alis,
Haremburgis qui tint le Maine,
Et Jehanne la bonne Lorraine
Qu'Englois brulerent a Rouan ;
Ou sont ilz, ou, Vierge souvraine ?
Mais ou sont les neiges d'antan ?
Prince, n'enquerez de sepmaine
Ou elles sont, ni de cest an,
Qu'à ce reffrain ne vous remaine :
Mais où sont les neiges d'antan ?
|
